中環出更：懶人方法救世 莊惟傑盼引起關注
正所謂為善最樂，若果足不出戶，甚至瞓喺張床都可以幫到人，相信大家都更願意伸出援手！有團體就發起名為「懶人救世大行動」嘅活動，每月都會精選「國際日」做主題，畀市民透過簡單嘅行動，一齊實現聯合國所定下嘅可持續發展目標。負責計劃嘅晉峰青年商會副會長莊惟傑（Ezgine）就話，覺得最特別嘅主題係11月嘅「世界廁所日」，事關佢曾經親身用過好落後、好污糟嘅廁所！
佢話好多年前北上工作時，曾經用過一個好落後嘅公廁，事關個尿兜爛咗，無咗個容器盛載住啲排泄物，所以搞到成個廁所都好污糟。佢就話，其實喺全世界唔少地方，有唔少人都面對無清潔食水同乾淨洗手間嘅問題，仲會引伸到公共衞生嘅問題，喺疫情下更加需要盡快解決。佢話香港好多公眾場所都冇育嬰間，所以亦都會希望透過活動引起市民關注。
Ezgine又話，其實聯合國同唔少團體推動可持續發展目標多年，但唔少市民對呢啲議題嘅認識同關注都唔多，覺得可能係因過去唔少活動都要求參加者做太多嘢而卻步。佢話今次計劃會朝住用最懶嘅方法，即係消耗最少卡路里同最少碳排放嘅方法吸引大家參與。
冼琬寅籲捐書 人人有終身學習機會
該會助理副會長冼琬寅（Vanessa）話今個月嘅主題係「國際教育日」，佢哋依家就同慈善團體合作發起捐書活動，希望可以令到每個人擁有終身學習嘅機會。佢又話早前亦訪問過唔同教育工作者，了解佢哋點樣喺體制內外教育下一代。
為項目擔任籌委嘅鄭凌亦都話教育係一切嘅基礎，所以希望活動可以幫到唔同階層嘅人都能夠接受教育。佢仲講到依家香港嘅小朋友普遍較以往聰明，所以教佢哋嘅時候都唔可以用舊一套方法添！
卓妮