中環出更：新公務員工會解散 議員追問資金流向
喺前年反修例風波期間成立嘅「新公務員工會」前日宣布解散，咁之前收咗嘅會費又點算呢？唔少議員都關注會費嘅去向。議員陸頌雄喺社交平台貼文，直指為政治而搞嘅工會始終唔會長久，又指帳目應該要透明同公開。
稱逾百萬會費捐款贈慈善機構
陸頌雄話不如大家估吓工會收咗幾百萬元嘅會費，同埋早前籌款得來嘅錢會點樣處理？另一議員張國鈞都質疑工會收晒會費，然後「一句唔該」就解散，咁會員費又會點處理呢？張仲寸工會，話其實理事們辭職公務員，再將個名改做離職公務員工會就得啦，政府都管唔到嘅。
前新公務員工會主席顏武周就解釋，會費會按會章規定，捐贈慈善機構。至於會員資料，顏指稍後會詢問職工會登記局，之後再向會員交代。新公務員工會喺上年6月大約有3,200名會員，而工會年費為50元。事緣公務員事務局日前發通告，要求所有公務員喺4星期內簽署聲明擁護《基本法》及效忠香港特區，「新公務員工會」預計所有理事均有可能無法繼續留喺政府，變相失去工會會員資格，理事會可能將面臨人數不足，故日前決定解散工會。
卓妮