政情：罕見病未獲新藥 田二少叫政府找數
現屆政府上台之初，鍾意行親民路線，而當時有「脊髓肌肉萎縮症」嘅病人向特首請願，要求引入新藥。儘管用嚟醫呢個病嘅新藥喺香港註冊已逾兩年。之但係，本港目前只得十幾個兒童同一個大人獲安排用藥，當局早前指若求助個案屬早發性患者可獲安排。議員田北辰（田二少）上周三同相關團體開完會後，就喺社交媒體發貼文鬧爆當局走數，指早發性患者屬大多數，仲暗寸當局可能唔熟情況，話會整埋份名單畀佢哋找數啊。
話說田二少早前喺衞生事務委員會質問，點解新藥嘅應用情況咁少時，醫院管理局總監楊諦岡就推搪話，依家可以用藥嘅成人患者都係喺幼童期或嬰兒期發病，成年先至發病嘅病人暫時唔適合試藥喎。而楊當時亦承諾，將來若有需要，佢都好樂意安排其他早發性嘅患者用藥。
暗寸唔熟情況 幫手整名單
之不過田二少日前同香港罕見疾病聯盟開完會後，就狠批實情並非醫管局咁講。佢話據聯盟統計，依家每55個成人患者，只有一個係18歲之後先發病，換言之，大部分患者都屬早發性，而目前所知就有幾十人未獲安排試藥。田二少促請醫管局找數，而佢亦會幫手整理名單，希望當局唔好走數啊。