政情:黑衣人潑白色粉末襲保安 段崇智:若涉中大成員感痛心

香港中文大學日前有黑衣人搗亂,保安員上前制止嘅時候被潑灑不明白色粉末。中大校長段崇智尋晚喺網上發布影片,對有保安受襲感到震驚同不安,話施襲者嘅行為唔可以用表達訴求或者個人立場作藉口,如果涉及中大成員,佢會覺得痛心同失望。

斥行為純粹為破壞

段崇智話大學係一個追求知識嘅地方,任何人有不同意見都應該保持理性。佢又批評黑衣人嘅行為係純粹破壞,威脅校內人士安全,後果好嚴重。佢強調,大學有責任保護每一個人,包括職員、學生同埋訪客嘅安全,授權保安人員執行措施都係想所有人可以喺校園內安心學習同工作。

另外,佢話事件發生後大學已經即時檢討,同時安排加強保安措施,又指每次校園發生事故,佢都會即刻了解詳情同埋商討善後工作,呼籲市民畀校園成為追求真理知識嘅理想之地。

第一手消息請下載on.cc東網iPhone/iPad/Android/Windows Phone Apps