中環出更：放寬兩蚊搭車得個拖字 梁志祥斥港府當人白癡
長者兩蚊搭車優惠擴展至60歲，唔少巿民都引頸以待，但勞工及福利局局長羅致光早前話製作長者個人八達通需時，結果優惠計劃一拖再拖，預料最快都要到出年6月先至有望落實，一直為爭取呢個福利嘅議員梁志祥（祥哥）怒轟政府咪當市民白癡，認為有心做就要盡快做。
賴製個人八達通需時
祥哥日前喺社交平台拍片話，市民近期都好關心，到底60至64歲長者兩蚊搭車優惠幾時可以實施，佢話呢個福利早喺2019年嘅施政報告提出，政府當時預料舊年年中就能夠推出，不過舊年年頭就已經有聲音話唔可行，要延後到年底先得，去到舊年接近第3季嘅時候，有人放風話政府想縮沙，有政黨對此表示強烈反對，於是政府喺舊年年尾就話今年年頭搞得掂，但結果都係令人失望，事關羅致光近日表明，擴展兩蚊搭車優惠嘅前提，係要重新製作個人八達通，加上八達通公司人手唔夠，估計要等到出年6月之後，先至可以正式推行。
面對政府一拖再拖，祥哥話真係火都嚟埋啊，佢話製作八達通其實唔算好複雜，只要為60至64歲嘅八達通持有人，換上新嘅八達通卡就得，祥哥又呼籲政府「千祈咪當市民係白癡」，強調要做就盡快做。卓妮