中環出更：流水響變打卡勝地 羅庭德：交通已難負荷
港人真係好鍾意旅行，雖然旅遊氣泡重啟無期，市民就改為尋覓本地遊好去處。位於八仙嶺郊野公園嘅流水響水塘，往時都有香港天空之鏡嘅美譽，近日就因紅葉倒影，引來遊人如鯽。北區區議會主席羅庭德都話打算去流水響喎，唔知係去趁墟還是打卡呢？
原來兩樣都唔係喎。佢話過往流水響唔係咁熱鬧，但由於今年天氣凍、陽光又充足，令流水響都滿布紅葉，加上被媒體炒作，以致當地唔單止假日逼爆，就連平日都就嚟「人踩人」呀。咁佢去做乜呢？佢話係見到遊人有增無減，交通不勝負荷，約咗政府人員過兩日到場視察，睇吓可否紓緩當地交通問題啫。之不過，佢先前都經常去流水響嘅，仲話當地冇紅葉嘅時候，景色都相當迷人o架！
獅子山青年商會副會長梁慧珊好鍾意做Gym（健身），只不過呢排健身房閂晒，惟有去遠足，嚟緊都打算去流水響睇吓風景。被問到依家疫情嚴峻，驚唔驚遊人太多容易染疫？佢話人多都要生活，惟有盡量小心，同其他遊人保持距離。而佢嚟緊仲會去千島湖、大東山等地方，繼續同朋友去行山之餘，都欣賞吓本地嘅山水。
陳月明：打鼓嶺芒草亦成熱點
有人想去流水響，有人就驚咗唔敢去喇。打鼓嶺鄉事委員會主席陳月明話唔打算去流水響睇紅葉，一來嫌人多，二來打鼓嶺都有風景睇。佢話打鼓嶺遍地都係芒草，寧靜嘅村落加上小山丘上嘅芒草，好適合睇日落o架。美中不足嘅係，打鼓嶺嘅芒草都變成打卡熱點之一喇，最近都唔少遊人到訪，搞到村民都唔多習慣，所以佢呼籲郊遊人士嚟到都要戴好口罩、同埋執番走自己帶嚟嘅垃圾呀。卓妮