中環出更：名人談夢想 顏吳餘英自幼立志從商
每個人細個都會有自己夢想，之不過又有幾多人真係可以實現到？香港中華廠商聯合會名譽會長顏吳餘英就真係實現到喇，事關佢細細個就已經立志要從商，長大之後亦試過喺唔同方面發展添！
卓妮日前喺中環遇到顏太，問起點解細個就立志從商，佢話因為細個家境比較清貧，所以立志大個咗後要從商，出頭機會大啲，到時就可以脫貧，等屋企生活環境過得好啲。最終佢都可以實現夢想，仲試過喺做玩具、投資酒店等多方面發展添，雖然過程中都有失敗過，但佢冇氣餒，仲將失敗經驗同仔女分享，希望佢哋唔好咁輕易放棄。
馬清楠寄語堅強面對順逆境
之後又遇到保良局前主席馬清楠同埋金融服務界議員張華峰嘅太太。馬清楠話細細個就立志想做律師，因為當年太多不公義嘅事，覺得做律師可以「路見不平，拔刀相助」。至於佢點實踐夢想呢，原來佢讀書時喺律師樓從低做起，工作後仲要返爸爸寫字樓處理文件。雖然過程中好辛苦，但佢最終都得償所願，畢業後仲做過法律援助等工作，喺保良局都有提供法律意見。佢仲寄語年輕人要堅持自己夢想，順境逆境都要堅強面對。
張華峰太太嘅夢想係想成為一位社工，但最後因為讀書成績未達到要求，所以佢就放棄咗。佢解釋，當年因為社會上有太多人需要幫助，覺得幫到人自己會好開心。雖然最後做唔成社工，仲轉做金融市場嘅工作，但佢覺得可以用唔同嘅途徑去幫助有需要嘅人，例如參與公益善事，認為最緊要係長存愛心。
卓妮