政情：官員遊花園迴避問題 葉劉：索性熄咪

懶理發言時限 削議員追問機會

批評政府官員嘅表現，葉劉已經唔係第一次，過往曾指出副局長同埋政治助理表現參差，當時仲關注政府請人時有冇統一標準，同埋有冇培訓咁，之後佢亦點名指摘，有局長處理問題時「唔係好幫得手」。喺尋日立法會內務委員會上，葉劉就鬧爆班局長，經常以冗長時間嚟回應議員口頭質詢，搞到啲議員冇機會追問，質疑班官員係想拖時間之餘，仲鬧爆佢哋回應追問時「遊花園」添。佢提及，班官員往往懶理發言時限，要求鐘聲一響主席就要作出口頭提示，否則就「熄佢（政府官員）咪囉，我哋（議員）咪可以問囉。」

政府屢遲交文件 當開會「走過場」

對班官員不滿嘅，又點止葉劉一個呢。議員田北辰就批評政府成日好遲先向立法會提交文件，收到文件之時，助理都已經收咗工，搞到唔夠時間準備。佢仲以去年嘅兩個事務委員會會議做例子，分別係喺11月底嘅交通事務委員會，佢喺開會前一日、傍晚6點左右先收到文件；而另一個會議就係12月中、朝早開會嘅衞生事務委員會會議，佢喺前一晚嘅10點幾先至收到文件。佢話建制派議員都要肩負監察政府嘅責任，希望政府明白喺立法會開會唔係「走過場」喎。

議員謝偉俊都認同，仲話希望主席可以捉緊啲時間，唔好次次搞到得番一兩位議員先有機會追問。唔止政府官員，面對最近嘅內委會會議，都有唔少議員會就疫情同埋經濟問題提出意見。謝偉俊就提到，話內委會應該係處理立法會內務事宜，唔係每周發表意見，搞到好似「每周寄封家書畀司長（政務司司長）咁」，希望議員可留意吓。其實議員定官員都各打五十大板，與其不停互相批評，倒不如齊齊檢討好過啦。