中環出更：馬道立離任 議員斥拒司法改革失公信力
終審法院首席法官馬道立下周一（11日）退休離任，尋日係佢退休前最後一個工作日，佢喺下午5時半左右離開終審法院，登上座駕離開。至於張舉能下星期一起接任終審法院首席法官。馬道立早前會見傳媒，仍然死撐話法官唔會畀任何人嘅政治意見影響，仲聲稱唔反對改革司法機構，但就要有理據。有議員批評，馬道立在任十年間，司法機構冇乜點改革，而且公信力每況愈下。
對訴求「聽唔到睇唔到」
議員葛珮帆表示，過去都有就司法機構改革嘅事提出意見，包括增設量刑委員會、司法機構「無紙化」等等，但司法機構進展緩慢，有啲建議仲要爭取多年先有回應，批評馬道立喺改革方面非常保守，對此感到失望。
對於馬道立喺臨別前先話唔反對司法改革，葛珮帆就認為市民一直要求司法改革嘅聲音大，立法會亦有提供研究報告，但馬道立一路都聽唔到、睇唔到，葛形容係高高在上、好離地。馬道立離任後，將會由終審法院常任法官張舉能接任首席法官一職，葛珮帆就希望張舉能上任後，會願意推動司法機構改革，重建市民信心。
卓妮