中環出更：擺脫草根風格 方樹樑：廣東歌趨文雅
歌曲，是用來說故事的。以廣東話為母語嘅香港人，聽同唱廣東歌似乎係順理成章。然而曾風靡東南亞嘅廣東歌，往日嘅強勢似乎一去不返。本地資深音樂人方樹樑，就話作為流行文化，戰後嘅香港曾一度係國語歌嘅天下，後來就以歐美歌曲為主，直至半個世紀前電視革命興起，廣東歌就乘勢崛起咁話。
方樹樑日前係應願景基金會之邀，為「全港中學唱作比賽」嘅決賽擔任評審工作。對比廣東歌嘅今昔，方樹樑話變化頗為明顯，譬如隨住經濟條件嘅改善，廣東歌亦漸漸擺脫過往傾向草根嘅風格，往文雅嘅方向發展。佢又話上世紀嘅80同90年代，香港嘅音樂人會不時前往東亞或歐美物色悅耳嘅流行音樂，購買版權繼而填上中文歌詞，亦係製作廣東歌嘅一大途徑，不過隨住資訊科技嘅蓬勃發展，聽眾可輕易接觸外國嘅原創歌曲，相形之下港人嘅音樂創作就稍嫌不足。儘管廣東歌難復昔日嘅盛況，但對於參賽同學嘅唱作熱誠，方樹樑予以肯定。
甄韋喬：譚詠麟張國榮係永遠歌神
講起廣東歌嘅輝煌歲月，基金會主席甄韋喬（Mickey）嘅年少時代就正好經歷咗呢個階段，仲話喺佢心目中，譚詠麟（阿倫）同張國榮係佢永遠嘅歌神添。唔止o架，Mickey當年都有跟阿倫啲衣着扮演同剪machi頭啊。佢仲話卡拉OK還未流行，佢哋成班朋友就鍾意去歌廊唱歌，事關搵多幾個朋友陪佢一齊唱，陌生人面前可以壯吓膽咁話。至於最拿手嘅「飲歌」，就係阿倫嘅《幻影》，次次去歌廊都會唱咁話啊。問到依家廣東歌仲受唔受歡迎時，Mickey就話廣東歌曾名震一時，希望大家都唔好放棄，繼續努力創作廣東歌咁話啊。
至於當日嘅冠軍得主、來自荔景天主教中學嘅組合「留心棉花糖」，林泳蕎及黃心怡就話，自己發夢都估唔到會攞冠軍，希望佢哋呢首廣東歌《共你》可以畀到大家疫情當中一個希望，攜手掃走負能量。
卓妮