政情：立會閘機玻璃門漏罅 議員：只能防君子

根據立法會文件，工程將會分兩階段進行，第一階段正喺立法會大樓外嘅範圍展開，包括沿添美道及立法會道一帶，以及廣場周邊，即係示威區外嘅範圍增設花槽圍欄，圍欄高度比一個正常人仲高，預計會趕及喺今個立法會會期內完成。

與建築署傾補救措施

另外，近添馬公園一帶嘅立法會廣場周邊進行第二階段工程，會安裝冇花槽嘅圍欄，但暫時未定工程展開日期，預計會喺下個立法會會期內完成。近日立法會地下議員入口已經加裝閘機同玻璃門，雖然有一個人咁高，之不過玻璃門並唔係完全密封，門同門之間竟然有大大條「罅」喺度，保安效果存疑。立法會行政管理委員會成員、議員陳克勤形容係「漏招」，相信好似佢咁身形較瘦嘅人都可以捐過閘機，會同建築署商討補救措施。克勤又相信要堵塞漏洞，但並非萬無一失，皆因呢啲保安措施只係「防君子」，如果要夾硬衝撞就防唔到喇。