中環出更：內地律師執業試延期 陳曼琪終可抖番晚
香港新冠肺炎仍未受控，今個月底喺內地舉行嘅一個內地律師執業考試都受到影響而需要延期呀。幾位「搏晒命」溫書嘅律師都話考試難度太高、平日又多嘢做，依家終於可以鬆一口氣喇！香港中小型律師行協會創會會長、執業律師陳曼琪（Maggie）話，前日得知考試延期，即刻將本書擺埋一邊，然後抖番晚添！
之不過，Maggie都係抖咗一晚，皆因佢話今次考試係好大挑戰，雖然唔知考試延期到幾時，但佢都唔敢鬆懈，反而話要喺短時間內讀完大量內容，好驚會「肥佬」添呀！佢話諗番起學生時期記性好好，中學階段最叻係歷史科，成本書可以由頭背到落尾，但依家記性若果有當時嘅一半就算係咁喇，惟有將勤補拙喇。
何君堯：用餘下時間最後衝刺
另一個本身係執業律師嘅議員何君堯（Junius）得知考試延期後即刻話「咁梗係好事啦」，因為可以畀多啲佢準備。雖然佢話每次考試都係「臨急抱佛腳」，但往往埋門嗰一腳都好準，而今次都會破釜沉舟，用餘下嘅時間作最後衝刺。被問到有乜嘢讀書方法？Junius就話將會舉辦小型讀書會，組織一班志同道合嘅朋友坐埋一齊讀書，仲話咁樣可以刺激到腦細胞喎。
而身兼執業大律師嘅議員容海恩（Eunice）都話最近一方面要處理議會嘅事務，另一方面又要研究對財政預算案嘅建議，實在周身都唔得閒，所以讀書進度未如理想，至今先至讀咗兩個Chapter（章節）咋。佢話自己都係一路進修，經常要面對考試，但今次考試比較高規格，倘如期進行，佢都驚會「肥佬」，所以都會加把勁喇。卓妮