政情：除罩拍片 蕭若元認衰難平眾怒 台高鐵向警舉報
現時身在台灣嘅網台負責人蕭若元日前喺社交平台上載影片，畀當地市民投訴違反台灣高鐵公司規定，喺高鐵車廂內除口罩拍片，事後佢雖然知衰急急腳補鑊，將影片下架並向公眾致歉，但係台灣高鐵公司尋日就譴責蕭嘅行為，仲話已經向警察及相關機構舉報。
高鐵公司話蕭嘅行為已違反高鐵設施內拍攝嘅相關規定，批評其行為「有影響旅客健康安全之虞」，唔單止要求蕭將影片下架，又要求賠償有關費用，更已經主動向警察及主管機關，檢舉蕭違反防疫規定，話係為咗捍衞高鐵公司及旅客權益。
高鐵內拍片需事先申請
高鐵公司又強調要喺高鐵設施內拍片前需先提出申請，如果未經許可就進行拍攝，一經發現會立即停止其拍攝及視乎情節輕重，循法律途徑維護應有權益。
其實喺各地疫情肆虐嘅情況下，任何人都要遵守防疫措施。蕭若元今次嘅行為唔單止令台灣民眾對港人產生負面印象，佢更要面對法律責任，大家真係要引以為鑑喇！