政情：市民投票「安」膺年度漢字
2020年仲有3日就過去喇，今年發生好多大事，好似年頭嘅反修例示威仍有持續、到香港乃至全球嘅新冠肺炎疫情大爆發、本港嘅立法會換屆選舉更因此首度延期舉行，以及實施《港區國安法》等等。近日就有政黨舉行「2020年度漢字」投票活動，並喺尋日公布結果，最多人認為適合形容今年嘅漢字係「安」。有嘉賓就估計今年始終都疫情橫行，反映有平安含意嘅「安」字，正係市民最想得到嘅事情啊！
話說「年度漢字」評選活動已經連續舉行第7年，今年都有10個唔同嘅漢字畀市民投票，並吸引咗約1.5萬人參與，揀出佢哋心目中最能夠代表2020年嘅漢字。當中，最多人揀嘅「安」字就有5,710票，其次係「疫」同「撐」，分別有2,772票同1,953票，再跟住依次就係「抗、罩、停、暴、封、限、隔」。負責主持今次活動嘅觀塘區議員顏汶羽就話，「安」字嘅票數遠遠拋離排第2同第3嘅漢字，認為係壓倒性嘅結果啊。
動盪一年 市民最渴望平安
另外，有在場嘉賓表示，幾乎所有由「安」字組成嘅詞語都係正面，好似「安全、安定」等，佢估計咁多人揀「安」字，可能正正因為經歷咗唔平安嘅一年，依家心中最渴望就係得到平安，希望新一年香港可以過得安樂咁話。咁又係，2020年的確唔易過，但關關難過關關過，唔知你哋心目中嘅年度漢字又係咩呢？