中環出更：無得去旅行心思思 陳沛然帶家人去夏威夷
好多港人都有鋪旅行癮，一有出遊嘅機會都唔會輕易放過。剛過去嘅聖誕長假期，醫學界議員陳沛然（Pierre）就帶幾位千金到戶外吸收一下陽光。至於目的地，就係具旖旎風光嘅「夏威夷」喇。
雖然Pierre嘅幾位千金年紀尚小，不過都話唔相信係去「夏威夷」啊！其實Pierre係同家人去西貢區嘅「小夏威夷徑」行山。「小夏威夷徑」嘅起點及終點分別位於西貢井欄樹以及將軍澳，考慮到小朋友嘅體力同埋步速，Pierre選擇由井欄樹出發，原因係呢個方向全程落山。佢仲將地圖預計嘅24分鐘行山時間加多1.5倍，結果行咗60分鐘。儘管入口比較隱藏，但Pierre好快就睇到路牌，按指示步入綠油油嘅山林，然後沿石板路前行，跟住就見到幾個小瀑布，越過一道橋後有個影相位，可以遠眺將軍澳城市。因疫情嚴峻，Pierre話今次行山都係戴住口罩，盡量避開人群，同埋保持社交距離，兩人一組。
商務及經濟發展局前副局長梁敬國（Godfrey）就因為聖誕日一時放縱，食咗個熱辣辣菠蘿油，於是翌日嘅「Boxing Day」佢就去踩單車，打算狠狠咁消滅菠蘿油所帶來嘅脂肪。本來Godfrey有意見識一下通往元朗嘅單車徑，不過佢去到粉嶺就搵唔到去上水嘅路，前往元朗嘅單車徑路牌就更加舉目難尋。結果兜兜轉轉，都只能夠去到上水，最後惟有放棄前往元朗嘅念頭，打道回府食晏！仲話唔明白花咁多錢築條單車徑，點解唔做好啲，整好啲指示牌喎。
黃偉鴻日本滑雪險蕩失路
品牌發展局副主席黃偉鴻（Ellis）就喺聖誕節當日，透過社交平台分享佢今年年初到日本北海道滑雪嘅相片。Ellis話當日上到滑雪場山頂，就孭住滑雪裝備尾隨幾位外國人步向後山，嘗試未經人工平整嘅天然滑雪道。雖然耳目一新，但前面嘅外國人好快就失去影蹤，由於欠缺路牌指示，當時獨自一人嘅Ellis惟有靜待下一位滑雪人士經過，然後再尾隨落山返回住宿地點。卓妮