受疫情影響，全港中小學同幼稚園都要暫停面授課堂。教育局局長楊潤雄日前喺社交平台分享政治助理施俊輝同喺幼稚園讀書嘅女兒喺屋企睇書嘅相片，藉此表揚施俊輝係一位好爸爸，幫助女兒居家學習，增進親子關係。不過貼文一出，就引嚟網民「負評」，留言話唔係個個家長都唔使返工，可以留喺屋企照顧小朋友，又話市民實際生活係點局方一啲都唔知咁話。
楊潤雄嘅原意，係打算宣傳「停課不停學」，鼓勵幼兒在家學習活動，寓學習於遊戲。儘管有少數留言話支持，但更多嘅係炮轟教育局嘅聲音，譬如有網民話打政府工真好，可以居家工作陪子女學習，反問為口奔馳嘅家長，點樣留喺屋企同小朋友睇書？又指摘因為政府高層嘅決策，令好多基層生計受影響，教育失敗局方責無旁貸，質問享受高薪厚祿嘅楊潤雄對得住香港市民嗎？
有網民指斥楊潤雄永遠只係睇到自己想睇嘅嘢就以為自己做得好好。亦有網民寸爆話，咁即係證明政治助理係高薪冗員，拍得住局長，建議取消呢個職位，等佢可以專心返屋企教導女兒。