中環出更：疫下聖誕可以做乜？ 石禮謙孖老婆恩愛購物
又到聖誕、又到聖誕！因為疫情緣故，今年無得熱熱鬧鬧咁開聖誕Party（派對），不過大家都有唔少方法慶祝喎！卓妮尋日下晝喺中環超市就見到議員石禮謙同老婆一齊購物，心情似乎唔錯，仲買咗好多嘢，滿載而歸，但點知去到畀錢時就大排長龍，兩公婆迫於無奈要自助付款喇。
依家全城爆疫，加上禁聚令，石禮謙點樣過聖誕呢？佢就話疫情下嘅聖誕，只係同老婆喺屋企靜靜咁度過，仲笑言自己都識下廚o架！不過佢買咗好多魚生，應該唔使大展廚藝喇。兩公婆支付貨款後就相當恩愛咁，一齊推住購物車登上私家車，返屋企慶祝甜蜜聖誕喇！
議員柯創盛（柯仔）就喺社交網站發布短片，見佢喺屋企穿上一身聖誕老人裝束，仲話保證有笑彈，到底搞邊科呢？原來柯仔喺屋企播住聖誕歌玩健身環，佢話平時都係着住短褲做運動，但係為咗氹大家一笑，真係去到盡，見到佢爆晒汗啊。柯仔話過去連續15年，都會落區化身成聖誕老人，派禮物畀大小朋友。不過今年因疫情而被迫暫停，一於居家抗疫，但都希望繼續帶歡樂畀大家咁話。
陳沛然趁佳節親自下廚
醫學界議員陳沛然（Pierre）喺社交網站上載相片，見到佢一個人踢波，話禁聚令下無辦法，惟有求其搵個空地自己練習，莫非真係要過一個「Lonely Christmas」？當然唔係喇，問到Pierre點樣度過聖誕正日，佢話疫情期間無得去旅行，多咗時間匿喺屋企，趁住聖誕佳節仲會親自落廚，問到佢有冇準備火雞，佢話唔使咁誇張，煮吓意粉、煎吓牛排畀屋企人食就夠晒喇。不過慶祝之餘，當然要「盡忠職守」喇！佢同家人一齊布置屋企時，仲為棵聖誕樹戴上口罩，笑言呢個就係今年聖誕嘅主題喇。
卓妮