政情：梁耀忠告別立會大樓 對政局混亂感無奈
民主派議員早前宣布總辭，近月陸續撤出立法會。前議員梁耀忠尋日喺社交平台發文，話已經喺立法會大樓工作10年，加埋前立法局嘅任期，前後參與立法工作24年，對離開大樓感到依依不捨，仲話覺得香港政局混亂添。
梁耀忠話前日係身處立法會辦公室工作嘅最後一日，回顧番過往政府都曾採納過佢喺民間推動多年嘅政策，其中包括最低工資。之不過，佢覺得香港嘅政局依家好混亂，就感到十分無奈。過往梁所屬嘅街坊工友服務處（街工）話會參與初選，但最後又話視乎民調而決定，最終被炮轟兼跪低宣布唔選。對於梁離開，有網民留言話「真係好黯然又遺憾」；亦都有人留言「你收×啦！」
泛民敗走 9樓只剩空房
前日係民主派議員搬遷限期，唔止梁耀忠，民主黨黃碧雲亦喺前日離開。民主派議員嘅辦事處集中喺9樓，黃碧雲就話依家9樓冇泛民議員，只剩番冇人使用嘅辦公室，形容係另一番景象。