政情：民建聯電話遭惡搞 反應慢隔日始澄清
有超市早前推出計劃，透過慈善團體向有需要人士派發現金券同餐券。而近日網上流傳多張相關計劃嘅單張，單張上嘅聯絡電話竟然係民建聯嘅地區支部及辦事處電話。民建聯尋日下晝4點半就喺Facebook發貼文澄清，強調有關單張並非由該黨製作喎。之不過，據了解民建聯早喺前日已經得悉有關事件，但去到尋日先出嚟澄清，搞到有老人家就係誤信單張內容，打到過去得個吉！
該黨喺貼文上就話，經查證發現佢哋被人惡搞，特此澄清並予以譴責，仲話會保留一切法律追究權利喎。翻查其中一款單張上3個聯絡電話，分別係該黨南區、元朗同觀塘3個支部嘅辦事處電話。
葉文斌：不排除會報警
身兼該黨成員、前屯門區議員葉文斌就形容佢哋係被人整蠱，批評製作有關單張嘅人立心不良喎。咁點解被人惡搞唔早啲出嚟澄清？葉就解釋，佢哋喺前日較夜嘅時分先發現呢張傳單，而發現咗之後都需要啲時間查證，以圖了解到底係單純嘅改圖，還是有人周街張貼實體街招。佢又話，其實受影響嘅老人家先係最慘，唔排除會就事件報警喎！