中環出更：導盲犬助人克服視障 張偉民：狗狗價值勝錢財
狗狗不但係寵物，某啲品種嘅犬隻只要予以訓練，就可以成為服務視障朋友嘅導盲犬。香港導盲犬服務中心嘅首間導盲犬訓練學院日前舉行動土禮，中心主席張偉民廿年前喺新西蘭做義工接觸導盲犬之後，毅然結束自己盤生意，赴澳洲求學繼而考取訓練員執照，到底係乜嘢事會令佢下咁大嘅決心呢？
張偉民話有賴導盲犬，失明人士先至可以克服視力障礙，從而改善生活。由於佢喺導盲犬身上體會到更勝錢財嘅價值，所以學成返港，就積極投入支援導盲犬嘅服務，並將服務中心嘅狗狗視為屋企人。
服務中心創會執委、全港首位導盲犬使用者盧光炘，憶述1975年嘅香港只有兩隻導盲犬，而佢就係其中一隻狗狗Winta嘅主人。佢話Winta好親人好嗲人o架，可惜遇上交通意外身亡，佢非常難過猶如痛失至親，由於當時香港嘅導盲犬服務缺乏支援，所以佢都無再領養導盲犬啦。
導盲犬服務中心第一個使用者黃民釗（David）同導盲犬Google相處將近10年。唔講唔知，其實David好驚狗o架，但領養導盲犬後，發覺狗狗情感單純，只要用心溝通，就會明白狗狗以口或者尾巴表達感受。David又話唔介意「狗奴」呢個稱呼，就算Google退役都繼續領養，已經當咗佢係自己個仔咁話。
多宗虐畜事件 鄧幼嫦痛心
有人愛護動物，但亦都有人虐待佢哋，服務中心副主席鄧幼嫦（Jasmine）對近期多宗虐待動物案件感到痛心，話「可以唔愛，但切勿傷害」。佢又指養動物之前一定要三思，因為養得佢哋就係一個承諾，必須照顧一世直至終老。Jasmine都係導盲犬寄養家庭之一，狗狗開始服役後，佢會出席一啲導盲犬都會出現嘅活動，探下呢啲曾經照顧過嘅狗狗。去到狗狗退役，佢又會將狗狗接返屋企，等佢哋安享晚年。卓妮