過往有「小金庫」之稱嘅獎券基金，如今竟出現乾塘危機。主要依靠六合彩收益嘅獎券基金，因疫情嚴峻而暫停攪珠逾半年，基金收入大減，另一方面又因撥款興建檢疫隔離營而導致開支大增，一來一回咁就錄得5億幾元赤字。由於香港人口老化，獎券基金撥款興建嘅安老服務設施，其需求將有增無減。基金目前雖尚有過百億結餘，但好多人都擔心「撐唔到幾年」，勞工及福利局局長羅致光真係要諗吓辦法，否則獎券基金就逃不過枯竭嘅命運啦。
