政情：鄭達鴻退出公民黨 表明不再選立會
近日公民黨接連爆發退黨潮，繼先後有5名前議員同區議員退黨後，該黨東區區議員鄭達鴻尋日傍晚亦喺社交媒體宣布，即日起正式退黨。鄭喺退黨宣言中話喺該黨嘅日子已佔咗佢32歲人生中嘅四分之一，又話「慚愧地我改變不了任何一件事」，又叫大家唔使猜測退黨係參選來年立法會選舉嘅策略，直言若果冇反轉現況嘅變化，佢係絕唔可能再參選。
5名前議員及區議員已退黨
喺退黨宣言中，鄭又談及過去曾有前輩同佢講，話：「阿達你就係黨嘅下一代」，因此佢無論喺內事或外事上都積極發表意見，可惜最終改變唔到任何一件事，覺得唔能夠走到最後感到抱歉。
鄭早前參選原定喺今年9月舉行嘅立法會換屆選舉，但最後被選舉主任以「不真確誠意地擁護《基本法》和保證效忠香港特區」為由，取消佢嘅參選資格。佢自2012年加入公民黨，2014年當選執委，而喺2019年就出任副秘書長。至於早前已退黨嘅人士則包括前議員陳淑莊、葵青區議員冼豪輝、譚家浚同南區區議員俞竣晞。