政情：教局得過且過 擴建校舍交行貨
唔少人成日都批評政府對特殊學童支援不足，依家政府雖然會為屯門一間特殊學校進行擴建，改善有關學校嘅教學環境，但有多名議員炮轟教育局嘅改善工作唔夠，包括即使擴建後人均面積仍然低過全港平均水平，仲質疑當局喺處理特殊學校問題上只係抱住「交差」嘅態度喎！作為局方代表，教育局副局長蔡若蓮就話會視乎各間特殊學校嘅環境作出改善，唔知又平唔平息到班議員嘅怒火呢。
話說尋日立法會財務委員會審議匡智屯門晨崗學校擴建計劃，以興建一座3層高嘅新翼大樓，提供5個課室同教學設施等，估算造價涉及6,120萬元。雖然議案最終獲通過，之不過議員田北辰就不滿政府未有同時處理該校同另一間學校共用學校禮堂嘅問題，關注當局會唔會承諾搵空置校舍去分拆兩間學校。
人均面積仍低於水平
當時蔡若蓮就回應話，強調局方會視乎各間特殊學校嘅環境作出改善，又話若果有學校需要新校舍嘅話，可以參與競逐使用空置校舍喎。咁嘅答案梗係惹嚟田北辰連聲不滿，仲連番追問，包括關注學校喺擴建之餘，同一時間亦都會增加學額，關注屆時嘅學生人均校舍面積有幾多。當局就話，擴建之後學生人均面積會由依家嘅5.1平方米，增加至12.6平方米，一聽完，田就鬧爆係低過全港平均水平。
議員質疑有雙重標準
之後發問嘅議員鄭松泰就形容，田北辰啱啱提出嘅意見可能喺局方眼中係太前衞，質疑當局喺處理特殊教育上，只係抱住「交差」嘅態度，一直冇考慮田所提出嘅問題，同埋特殊學生嘅實際需要。佢又重提，早前有另一間特殊學校提出擴建，但喺完成諮詢區內居民後，當局就以造價達4,000多萬港元為由，覺得唔值得擴建，所以關注政府喺處理唔同學校擴建申請時嘅準則。當局就回應，話唔同學校喺客觀環境上有所不同，又重提當局早年已經對全港40多間特殊學校進行過檢視喎。
查實議員咁激氣都唔係冇道理，事關特殊學校學生所需要嘅支援，甚至比一般學生更多。若果教育局繼續抱住凡事為求交差嘅心態，香港嘅教育問題又點樣可以改善呢？