政情：遭盜名做宣傳 何栢良或提告
除咗睇新聞之外，市民亦會透過社交平台接收疫情最新資訊，務求做好防疫措施，最近網絡出現一段由港大感染及傳染病中心總監何栢良醫生為防疫產品宣傳嘅錄音，不過何栢良前晚（9日）隨即喺Facebook發文澄清，話錄音並冇得到佢本人授權下使用，嚴正要求相關人士及公司喺相關產品錄音、連結、網頁同其他宣傳品上移除佢嘅名字。
曾教市民分辨錄音真假
何栢良強調，從來冇授權相關人士、公司、網站使用佢任何公開或者私人言論作相關廣告用途，個人絕對唔會買相關產品，亦唔會建議任何人士買相關產品。何又話，就今次未獲授權嘅相關使用，引起嘅誤導、誤解、誤會，一旦查獲出處，將會嚴肅跟進，包括考慮採取法律行動。
其實早喺今年7月，多個通訊軟件群組就傳出聲稱係「何栢良醫生發出」嘅錄音，當時何都有澄清，又教大家點樣分辨錄音真假，佢話真錄音頭兩句一定會介紹全名、錄音日期同時間，同埋唔會寫錯自己個名，更會有傳媒引用。