政情：冇晒泛民搞事建制民望反跌
隨着民主派議員總辭，立法會成為建制派嘅主場。之不過，冇咗民主派搞事，大家都攞住放大鏡，𥄫實建制派嘅一舉一動。有機構公布最新嘅議員評分，冇咗泛民墊底，到底邊個咁唔好彩要排包尾呢？議員鄭泳舜（Vincent）同陳恒鑌（Ben）分別就係最低分同評分最大跌幅嘅建制派議員喇！
香港研究協會尋日公布自第6屆立法會延任以嚟嘅首次調查，喺11月26日至12月8日就住地區直選同俗稱「超區」嘅區議會（第二）功能界別議員嘅表現，訪問咗1,070名市民。最低分嘅議員可以話係意料之內，就係非建制派議員鄭松泰。以滿分5分計算，鄭嘅評分下跌0.42分至2.02分，而喺上次調查，佢已經係新界西選區最低分嘅非建制派議員，即使民主派總辭，似乎都對佢冇乜影響，只係評分再創新低啫！鄭松泰回應話一直冇留意呢類調查，認為結果冇參考價值咁話喎。
鄭爭取居住權益反包尾
其餘最低分嘅議員就只係剩番建制派，依次分別係九龍西嘅鄭泳舜（2.06分）、新界西嘅梁志祥（2.11分）、九龍西嘅蔣麗芸（2.12分）同新界東嘅容海恩（2.16分）。Vincent嘅評分跌幅更加係第二大，下跌咗0.47分。Vincent一直為市民爭取居住權益，而政府新一份施政報告都有所着墨，承諾3年內提供1.5萬個過渡性房屋單位、為長期輪候公屋嘅低收入家庭提供現金津貼，研究為劏房實施租務管制等。不過就唔知點解Vincent嘅評分會排包尾喇，睇嚟佢要攝高枕頭諗吓先得。
至於評分排尾二嘅梁志祥就坦言今次結果合理，因為佢一早決定交棒，再加上疫情影響，少咗做地區工作，可能影響咗自己嘅評分。
年輕議員打卡文化累事
評分跌幅最大嘅係新界西嘅Ben，分數下跌0.49分至2.28分。佢回應話之前分數升幅較急，依家只係回落至正常水平。不過，佢都話「有則改之、冇則嘉勉」，會視分數為一個鞭策，強調工作會照做。網絡係其中一個接觸選民嘅重要平台，Ben話一直有固定做直播，如果有需要會改成每日進行，同時會改善節目質素。
之不過，有建制派中人就認為依家年輕一代嘅議員有「打卡文化」嘅通病，只係上網打卡，而少做實事，市民自然就噏唔出議員嘅名喇！