中環出更：議員紅牌離場擬加辣 謝偉俊：研扣減薪津
立法會議事規則委員會早前討論修改《內務守則》以防拉布，該委員會主席謝偉俊（Paul）尋日喺電台節目上就話，已完成諮詢議員嘅工作，但就有意見認為可暫緩修訂工作，喺檢視其他《議事規則》後再一併修改，明年1月再開會討論喎。佢話會參考其他國會做法，就議員被罰「紅牌出場」機制，研究扣減被驅逐離場嘅議員薪津，以提高阻嚇性。
Paul尋日喺電台節目上話，參考其他國會如有關議員被罰「停賽」唔可以出席會議，咁嗰段時間就會被扣起薪津。至於點樣界定所涉及嘅時間呢？佢話要視乎嚴重性，會再檢視係咪需要考慮呢個方案，但否認扣薪建議係「再辣啲」。
曾提出修改點算法定人數
另外，佢早前都曾提出研究修改點算法定人數嘅規定，佢解釋話現時《基本法》只限制議會法定人數，按《議事規則》同傳統，當會議人數不足時就會「打鐘」15分鐘。佢認為「打鐘」嘅做法較落後，建議改以手機通訊程式通知唔在席嘅議員，而過程中仍可容許會議繼續進行。
至於立法會正研究使用Zoom召開會議，佢就話暫時只計劃用喺非正式會議上，若要喺正式會議上使用就要修改《議事規則》，或通過動議容許立法會主席喺特別情況做唔同處理。卓妮