清潔工阿健同管工阿康完成工作後，準備收拾工具的時候。阿健說︰「康哥！我趕時間啊，執埋啲架生我就走啦。」阿康問︰「吓，你手都唔洗就走？小心病從口入，萬一感染到大鼠戊型肝炎就大鑊啦，呢排都有幾宗確診個案。」阿健疑惑︰「老鼠同肝炎好似大纜都扯唔埋喎。」
阿康解釋︰「大鼠戊型肝炎可能的傳播途徑包括進食或飲用被老鼠排泄物污染的食物或水引起、接觸被老鼠或其排泄物污染的環境或物件，及直接接觸老鼠或其排泄物。我哋工作嘅地方有機會接觸到老鼠，所以一定要保持良好的個人衞生，經常保持雙手清潔，尤其在處理食物或進食前，以及如廁或處理嘔吐物或糞便後應徹底洗手，如果唔係就好容易被感染！」
阿健問︰「咁如果感染咗大鼠戊型肝炎會點？」阿康答︰「初期會出現發燒、食欲不振情況，之後會感到腹部疼痛及肝臟發大，甚至出現壓痛等徵狀。嚴重嘅話，可能會造成急性肝衰竭和死亡。」阿健再問︰「咁點做先可以預防感染大鼠戊型肝炎啊？」
阿康答︰「老鼠係傳播大鼠戊型肝炎嘅主要媒介，所以一定要從源頭做起！包括妥善儲存食物免受污染，亦都要保持環境清潔，特別是垃圾房和樓梯清潔，避免堆積雜物，當然仲要定期巡查花槽同通道避免老鼠出沒啦！記得要用1比99稀釋家用漂白水進行清潔消毒，普通家用洗滌劑可能無法殺死戊型肝炎病毒。」
阿康又說︰「講咗咁耐，你仲唔快啲用梘液同清水洗手！記得搓手最少20秒，洗乾淨手掌、手背、指隙、指背、拇指、指尖同手腕先好收工！」
職業安全健康局
www.oshc.org.hk