政情：葛珮帆：外國疫苗難存放 國產貨勝在方便
本港嘅新冠肺炎疫情一波接一波，搞到全港市民都叫苦連天。要達到確診個案「清零」，恐怕大家都等緊廣泛接種疫苗嘅日子。立法會衞生事務委員會主席葛珮帆（EQ）就話，預計今個星期內、最遲下個星期召開委員會討論新冠肺炎疫苗來源、購買數量，以及落實全民接種嘅官方時間表等問題。
中央確保港疫苗供應
目前所知嘅政府購買疫苗方案，包括通過世界衞生組織嘅疫苗全球獲取機制採購，及與個別疫苗製造商預購，但外界一直憂慮政府最終都要大量買國產疫苗，而當局近日亦放風，指中央會支持香港並確保疫苗供應，但最終都要視乎需要嚟考慮喎。
被問到港人係咪難逃用國貨疫苗嘅命運時，EQ就話外國依家嗰兩款比較成熟嘅疫苗，都需要用零下70度嘅超低溫保存，直言本港根本冇咁多設備保存外國疫苗，而佢哋喺運送上都好麻煩，反觀國產疫苗就勝在運輸方便啲，而且又係最早研發嘅疫苗，加上巴西都有進口，認為市民唔使咁擔心喎。照咁講法，市民想快啲打到疫苗，咪即係要放下成見用國貨囉。