中環出更：購萬呎工廈做珠寶工坊 杜源寧：盼新血入行承傳手藝
珠寶首飾之所以瑰麗奪目，除咗別具匠心嘅設計，精湛嘅工藝亦相當重要。香港珠寶製造業廠商會主席杜源寧，就指香港嘅珠寶設計師人才輩出，相較之下工匠技藝雖然卓越，然而好多師傅今日都年屆花甲，有賴新血入行以承傳香港珠寶製造嘅優良工藝。
點解時下嘅年輕人，甚少投身珠寶製造業呢？杜源寧認為係長久以來，普羅大眾對業界欠缺認識，加上提供相關訓練嘅機構有限，以致後生仔要謀職擇業，珠寶製造業都唔會進入視線範圍，杜源寧話反觀內地因受惠於龐大嘅巿場規模，珠寶製造業不但發展蓬勃，部分地方更開設珠寶大學供有志者鑽研。儘管香港難以照搬內地嘅做法，不過商會方面都覺得，有需要為香港珠寶工藝嘅承傳，以及栽培人才出一分力，於是購入紅磡某工廈近一萬平方呎嘅單位成立香港珠寶工坊，為職業教學提供培訓平台，業餘愛好者可體驗全方位嘅珠寶製作知識，亦可作為獨立珠寶設計師嘅交流園地。
陳皚旻：引入職人文化改大眾觀感
香港珠寶工坊管理委員會委員陳皚旻（Rachel）係一位珠寶設計師。Rachel指香港嘅珠寶業絕大多數都係家族經營，而佢自己都唔例外，所以年紀輕輕就入行，不過佢都認為香港嘅珠寶業須有更多外界人士加入，先至可以迎合時代。然而過去珠寶工場較為凌亂嘅環境，加上師傅需持工具敲打模具，以致招來「扑佬」呢個不大文雅嘅稱呼，或多或少都會妨礙到年輕人入行嘅意欲，所以Rachel希望能借鑑日本嘅職人文化，對工匠予以尊重，而新成立嘅香港珠寶工坊，內裏嘅工作枱全部都係乾淨整齊嘅歐洲式，同傳統嘅工作枱可謂大相逕庭，冀引進現代嘅硬件設施能一改坊間對珠寶製造嘅觀感。
香港珠寶製造業廠商會副主席李偉材，就指純手藝而言，今日好多師傅都未必達得到昔日嘅水準，但若果懂得配合立體技術同電腦繪圖，其製成品嘅精細度往往更勝從前，雖然現代科技對珠寶製造係有莫大幫助，但還須富經驗嘅師傅操作，先至有最好嘅發揮。
卓妮