嶺南大學學生會編輯委員會（編委會）上月喺Facebook發文，內容係以演員伸脷畫面同埋字眼嚟諷刺校長鄭國漢。

編委會隨後接獲學生服務中心嘅電話，指校長留意到報道並感到遭受人身攻擊，警告於一周內修改，但編委會尋日就話決定不作任何修改。嶺大回應查詢時，就話會適當跟進事件。

涉事貼文係編委會上月26日發出，題為「政府設20億望吸納外國及內地研究人才　鄭國漢即發新聞稿撐」，仲配上有演員喺電視劇中伸脷嘅畫面，配以字幕「不停地舔呀舔的」，該演員嘅眼部、手部分別被加上「鄭國漢」同埋「政府」字眼，貼文仲附有「嶺藍大學」同埋「大家知唔知鄭國漢係美國人」等標註。

貼文發出後，翌日編委會接獲學生服務中心職員警告，要求喺一星期內修改，否則或會交紀律委員會處理。依家限期已過，編委會就話大學校園本應為各家思想嘅發源地，但嶺大近年斷送校內言論自由，又批評校方以「反對同學對校長人身攻擊」之名，行言論箝制及思想審查之實，無視該會作為獨立於嶺南大學架構內嘅自治性。佢哋仲話，會繼續堅守崗位，呼籲同學關注校園以至社會嘅不公與打壓。