政情：中環出更：擬探當區在囚街坊 區議員遭拒

屬於元朗洪福選區嘅區議員陳樹暉，尋日喺社交網站上載懲教署拒絕公務探訪嘅信件，佢原本計劃今日到赤柱監獄進行公務探訪，點知探訪自己所屬選區嘅居民都被拒絕。佢強調今次申請探訪嘅在囚人士，唔單止係元朗區居民，更加係洪福街坊，仲以為懲教署唔會再搬出「並非居於元朗區」嘅藉口拒絕申請。

懲教署指不作個別評論

申請以呢個原因被拒，陳就批評懲教署連囚友住址都可以講大話，照樣複製及貼上有關條例及原因，以否決其申請。佢亦已經喺收信當日即時提出反駁，但至今仲未收到懲教署回覆，難以得知究竟屬行政出錯，抑或涉其他原因。

懲教署回覆本報查詢就話，不會就個別個案作出評論。強調區議員需確切執行與區議會職能相關嘅公務，署方會就每宗申請作出考慮，如相關在囚人士向署方申報嘅住址並非區議員所屬選區，或拒絕提供住址資料，該申請將不會獲批。

卓妮