政情：中環出更：手錶「微品牌」主打精品化 孫大為：靠設計品味取勝
代理大品牌，往往係銷路嘅保證，不過香港鐘表業總會顧問孫大為（David）就似乎反其道而行，佢嘅手錶零售生意就包括「微品牌」。David話唔少人都停留於一種觀念，認為要大企業生產嘅商品先至有成績，但其實主打精品化嘅微品牌，就以內涵取勝並吸引唔少知音人咁話。
David指長久以來傳統大品牌主要係「賣牌子」，消費者相對少着重於鐘錶設計，但微品牌就要落多啲工夫，以設計、品味作為賣點。而微品牌嘅主要客群係年輕一代，所以傳統嘅宣傳渠道，例如喺電視、報章等大賣廣告已經唔吸引，反而要花多啲心思喺社交平台增加曝光。David又話近年嘅經濟大環境，消費者要錫住個荷包，因應時機推動微品牌就好合適喇。
黃偉健為實體錶作畫做宣傳
「時間、文化、工藝、藝術、創意」係鐘錶業所着重嘅五大概念，David近來就同國際水彩畫協會香港分會委員黃偉健 （Lawrence）喺藝術方面合作。Lawrence本身都對鐘錶非常感興趣，當然唔少得會收藏手錶喇，不過佢話自己買錶唔睇價錢，言下之意，莫非佢多多錢都畀得起？原來相比起大牌子，Lawrence更加追求手錶設計，特別鍾情於微品牌啊。Lawrence亦將興趣同事業結合，對照實體手錶作畫，再發布到網上平台，對微品牌而言，無疑係一種嶄新嘅宣傳手法，Lawrence形容自己半隻腳踩咗入鐘錶業，未來更計劃自行設計手錶，以及同微品牌加強合作。
香港鐘表業總會副主席蔡宗富，就指多年前歐洲有手錶達人透過線上經營而喺業內闖出名堂，而呢個成功個案就惹來唔少人倣效，繼而形成今日微品牌百花齊放嘅潮流。蔡宗富又話，憑新穎設計或獨特功能，微品牌不乏捧場客，而微品牌嘅業務雖以線上為主，但當中亦有通過同實體店合作以銷售現貨。除此之外，亦有個別嘅微品牌會利用期貨嘅概念，發起網絡眾籌以集資生產新產品，不過呢種交易存在風險，過去亦試過有爛尾嘅情況。
卓妮