政情：天文台擬擴建尖沙咀總部 陳梓維竟倡生態評估
天文台總部位處尖沙咀鬧市當中，由於一直唔夠地方辦公，所以希望喺原址進行擴建，日前仲邀請咗部分油尖旺區議員到天文台參觀。佐敦南區嘅陳梓維就話，同行嘅區議員都認同擴建決定，而佢就覺得喺擴建之前要做好生態評估，減少對該處嘅動植物造成生態影響喎。之不過，喺鬧市進行工程都要做生態評估，相信好多人都聞所未聞！
保育古蹟更值得關注
陳梓維前日喺Facebook發貼文，透露自己同其他區議員日前獲邀參觀天文台，又提到一行人認同天文台嘅擴建決定，事關關乎民生喎。之不過，陳梓維喺貼文亦提到，希望天文台喺擴建前要做好生態評估，減少對棲息嘅動植物造成生態影響喎。
其實生態評估一般會喺郊野公園、濕地等地進行，因為擔心工程會破壞具高生態價值嘅野生環境，對生態系統構成影響；而喺鬧市做工程，其環境評估就較為側重對社區嘅環境影響。話時話，查實天文台現址已經有超過130年歷史，相信更多人關心點樣喺工程中保護好啲古蹟同古樹喇！