中環出更：水果批皮有技巧 黃震：最緊要夠薄
新冠肺炎疫情全球大流行，市民依家冇得再周圍飛，惟有搜購各地手信同特產「止旅行癮」！有機構早前舉辦「2020台灣優質冬季水果特賣會」，向港人推廣12種由台灣產地直接空運到港嘅精選優質水果。有份出席活動、本身好鍾意食水果嘅香港中華廠商聯合會副會長黃震，就同卓妮分享食批薄皮水果嘅心得。
黃震強調最緊要啲皮要批得夠薄，先可以保留水果皮下最好味嘅果肉，仲大爆自己每晚喺屋企食完晚飯後，都要負責批水果添！佢又話全家人都好鍾意食水果，所以每晚至少都要批3、4個水果。佢又提到水果唔單止可以就咁拎嚟食，仲可以用嚟做食材，例如可以拎啲梨去燉嘢，或者用木瓜整甜品、煲湯咁，配合唔同季節滋潤身體，仲話覺得水果夠晒天然，好過化學成分喎。
同場仲見到主辦活動嘅香港台北貿易中心主任巫英臣，同埋香港台灣工商協會副會長賴明潔。賴明潔話以前會經常往返台港兩地，每次返到台灣都要去夜市掃街，仲會買好多台灣嘅太陽餅、Q餅帶番香港食；又話自己好鍾意食文旦柚，以往會喺當地農場運嚟香港，但今年礙於疫情影響貨源供應，所以先冇再運。佢又分享，水果一般要放喺陰涼位置，等到啱啱開始收水時就最好食。
李挺嚴選供應商防細菌
本身經營水果批發生意嘅李挺就話喺疫情之下多咗市民購買水果，例如菠蘿、木瓜同火龍果等台灣水果嘅銷量都比往年多。佢特別提到近年有港人認識台灣荔枝，因為其甜度同水分高，而核亦比較細粒，所以今年增長幅度比其他水果更為高。至於有市民擔心水果包裝上有機會依附細菌或病毒，佢就話自己有嚴選供應商，知道有嚴格嘅清潔程序，所以唔擔心喎。
卓妮