中環出更：面試準備要做足 李兆民籲讀熟行業資料
年輕人初出茅廬，謀事從來都唔容易，尤其是近年巿道不景，搵工就更加難上加難。葵涌扶輪社前社長李兆民就教路，不妨寄多幾封求職信，見工前做足準備，了解目標公司嘅背景，咁面試時就更加得心應手喇！
國際扶輪3450地區早前舉行扶輪職業平台啟動禮，目的係提供多一個平台畀年輕人搵到心儀嘅職業。為今次活動擔任籌委會主席嘅李兆民，回想自己當年剛離開校門，日日睇報紙物色啱心水嘅工作，然後就倣效漁翁撒網，一次過寄出幾十封求職信，跟住就「咪熟」相關行業嘅資料，為面試之時做好自我介紹。佢話，雖然依家有互聯網，搵工較以往方便且選擇多，不過以上見工前嘅準備工夫一樣要做足。
本身係醫生嘅國際扶輪社3450地區總監翟慶聰，佢話要懸壺濟世，都一樣要搵工做實習，尤其是熱門嘅專科就更加係爭崩頭，當年試過有同學等咗成兩年先有位實習，不過亦有同學覺得反正係要等，不如趁機會去試吓新嘢啦，於是就投身一啲當時新成立，相對冷門嘅專科做實習，後來仲發展得相當成功添！翟醫生認為年輕人有嘅係青春，搵唔到心儀或熱門嘅工作的話，不妨試吓其他嘅行業，有機會成為潮流先驅都講唔定o架！
劉燊濤：先了解公司背景
香港表廠商會常務副會長劉燊濤（Gary）雖然係從事家族業務，但以前都試過寫信去銀行求職，謀求搵份暑期工做。儘管求職經驗少，但面試應徵者就經驗豐富。Gary話試過有次面試，對方連佢公司屬於邊個行業都未搞清楚，一嚟就問公司嘅待遇，Gary話咁嘅心態搵工，就算請你都做唔長啦。
作為老闆嘅Gary就教路，見工前最好先了解間公司嘅背景資料，就算對行業唔熟悉都唔緊要，人哋見到你誠意十足，一樣會畀機會你慢慢學習嘅。
卓妮