政情：有相為證：離開立會 莫乃光要丟好多部舊電腦
政府早前取消4名民主派議員資格後，民主派議員決定以總辭抗議，近日一班議員都忙於執嘢，仲有個別議員已經遷離咗立法會嘅議員辦事處。做咗8年嘅資訊科技界議員莫乃光（Charles）日前喺Facebook上載咗幾張舊手提電腦嘅相片，驟眼睇起碼有成7至8部。隨住要離開立法會，呢批電腦都冇得留低，事關Charles就話要丟喇！
網民笑係歷史文物 開得展覽
Charles話呢堆電腦係呢廿幾年嚟所用嘅，仲形容係「歷史文物」添，佢仲透露有部分係國際知名牌子，仲要喺日本同埋美國製造添，不過依家就要丟喇。唔少網民睇見都覺得好可惜，叫Charles唔好丟晒啲電腦，有人就建議佢開博物館做展覽，又有人提醒佢要拆咗啲硬碟（Hard disk）分開處理，仲有人建議要將啲電腦轉送畀自己拎嚟做教材添。
