政情：劉炳章要打區議員屁股
近年政府大力提倡香港融入粵港澳大灣區發展，不過就惹起唔少爭議。前理大校董劉炳章尋日喺一個論壇上就話深圳早年燈都唔多盞，但依家就好光猛，反觀元朗仍然係「黑麻麻」，點知惹起同場嘅議員兼元朗區議員鄺俊宇（Roy）不滿，仲話「呢度有兩個元朗區議員，小心呀」。不過劉炳章就冇收口，仲話要打兩個區議員嘅屁股添。無啦啦講元朗「黑麻麻」，到底係話元朗落後，定係有另一番含意呢？
新一份《施政報告》上周出台，當中提到資助呢兩年嘅大學畢業生去大灣區就業嘅政策，劉炳章尋日就話唔好將香港同大灣區分割，香港人都係大灣區人，呼籲香港嘅年輕人要主動把握機會發展。之後佢仲突然想當年，話早年內地人經深圳偷渡嚟香港時，係望住香港好多燈光嘅地方而走，依家睇番轉頭元朗就「黑麻麻」，深圳就燈火通明。咁講法，唔通佢係指元朗落後過深圳？
高官被嘲冇送仔女返內地
作為元朗區議員，阿Roy聞言就即刻插嘴警告，話「嗱！呢度有兩個元朗區議員，小心呀」。點知劉炳章唔單止冇改口，仲話「所以就話啦，呢兩個元朗區議員要打屁股、打屁股係咪先」。不過阿Roy都冇反駁，而係反問既然大灣區咁好，點解香港啲高官唔將仔女送番去讀書，而係統統送晒去外國留學呢？睇嚟佢似乎暗寸高官冇以身作則喎！
議員斥改革通識科屬掩飾
除咗大灣區，近日《施政報告》另一爭議嘅戰場就係通識科要改名同埋評分準則。曾經出任大學客席講師嘅黃元山就話，依家通識科嘅範圍太廣泛，質疑學生係咪每個範疇都可以深入學習，仲話有75%校長覺得要改通識科，同時都有97%老師覺得通識科令學生嘅語文能力有提升，又認為依家將評分準則改為「合格或不合格」嘅做法恰當。
劉炳章就覺得學生唔敢挑戰老師權威，加上朋輩影響，好多行為觀念最後都係「跟大隊」，唔認為通識科做到「訓練學生獨立思考能力」嘅效果。不過阿Roy同另一元朗區議員張秀賢就質疑，政府想將所有問題賴落學生同教育制度上，直指改革通識科只係掩飾高官離地、政府無能嘅「代罪羔羊」，批評當局好似以為搞掂通識科就解決晒所有問題。