中環出更：鍾情本地遊 陳月明慶幸爆疫前去梅窩
香港人一向好鍾意去旅行，但礙於疫情又再爆發，原定香港同新加坡開展嘅旅遊氣泡亦被迫押後，唔知幾時先可以起行。不過，打鼓嶺鄉事委員會主席陳月明話，雖然好耐冇出門，但都唔會選擇去新加坡，就算日本開番關都唔會去，反而最近就去咗曾經爆發疫情嘅梅窩。
陳月明解釋，因為擔心小朋友嘅健康，所以唔會出門旅遊，寧願留喺香港本地遊。不過佢又話內地一直都係零確診，所以如果內地通關嘅話就會即刻上去玩。講開又講，佢話帶小朋友去本地旅遊會優先揀啲人煙較少嘅地方，最近嗰次就去咗梅窩喇！不過好彩係喺銀礦灣爆發疫情之前去，有驚無險。被問到驚唔驚會「中招」染疫，佢就話冇咁擔心，事關每次出行都會做好防疫措施。
邱榮光讚港地質公園世界級
香港環保協進會總幹事邱榮光就話有好多親戚喺日本，所以如果日本同香港達成旅遊氣泡，就會考慮去日本旅行喇！但佢又話就算港府同其他國家達成旅遊氣泡嘅協議，都難以釋除佢對彼邦疫情嘅顧慮，再加上有人數限制，所以打算等個系統行順啲先去。有排都未有得出門，佢就話香港都有唔少地方值得一遊，仲大讚香港地質公園係世界級，建議市民可以先享受地質公園，之後先再勇敢嘗試旅遊氣泡。
今次疫情都搞到唔少人冇得同屋企人團聚，新界鄉議局執委廖書蘭話有親人居於內地，前後加埋都有成幾年冇見喇，所以等兩地一通關就會即刻去探親，順便去遊山玩水。不過，佢就對短期內能夠通關唔樂觀，仲話要做好心理準備，可能要等明年先可以返去探親喇！
卓妮