政情：公民講場：酒店賓館變過渡屋 員工失業要露宿？

輪候公屋條隊愈嚟愈長，等上樓嘅年期亦愈嚟愈長，點解決基層人士嘅住屋問題，政府話搵多啲過渡性房屋，而喺新一份施政報告仲話會借用啲冇客嘅酒店同賓館做過渡屋。酒店同賓館老闆梗係讚不絕口，但有人歡笑有人愁，事關做咗過渡屋就唔使咁多房務員，即係遲早炒魷。政府做嘢永遠都有甩漏，運輸及房屋局局長陳帆搵到多啲過渡屋當交差，但冇理會到啲員工飯碗，依家失業率咁高，仲製造班失業大軍，簡直係顧此失彼。