政情：團購白米涉牟利 區議員被扣六位數津貼
由泛民主派主導嘅區議會同政府關係愈來愈惡劣，近日再有泛民區議員不獲民政事務處批營運津貼。屯門區議員張錦雄喺社交網站貼文話因曾為街坊提供團購白米服務，而遭民政事務處指佢涉嫌阻街同無牌賣米，或牴觸《區議會條例》，更扣起6月至今的津貼，涉款超過6位數字。
張錦雄喺貼文中話疫情期間為協助有需要嘅街坊，所以推出團購白米服務。坊間超級市場購買8公斤米需要110至130元，而向米商團購則可80蚊購得。佢最後以90蚊一包嘅價錢賣出，賺取嘅10蚊則會用作聘請「手足」搬米，同埋買米派畀有需要嘅街坊。
被投訴無牌賣米
相關計劃喺過去6個月內進行咗7輪，累積賣咗近800多包米，派出137包愛心米畀屯門鄉郊有需要嘅家庭，涉款7萬幾元，當中2,700元聘請「手足」做兼職搬米派米。張錦雄強調自己同職員或親屬並無從中獲得任何利益。
不過，佢喺7月收到民政處電郵，指有人投訴佢阻街同無牌販賣食米，涉嫌牴觸《區議會條例》。佢隨即要求同民政專員見面詳談，但未獲回應。
屯門民政事務處回覆話，接獲投訴，故曾向張作出查詢，要求他就活動提供進一步資料。然而，張一直未有向民政處提供所需資料，因此民政處暫未能就其個案作進一步跟進。