政情：楊岳橋失議員資格 黨魁執委都冇埋

公民黨成立14年來首無黨魁

公民黨黨章規定，黨魁一定要係立法會議員，所以今年黨魁懸空，事關成個黨都冇人符合資格，而喺公民黨成立14年以嚟，首次黨魁一職懸空，而譚文豪就接替已退黨嘅前議員陳淑莊出任外務副主席。至於楊岳橋會喺黨內擔任乜嘢職位，黨主席梁家傑就話楊喺黨入面嘅工作會有安排同部署，遲吓時機成熟會公布喎。有乜咁神秘呢？

被問到會唔會擔心黨內區議員被DQ，需唔需要主動聲明反對港獨同叫美方停止制裁香港，梁就話該黨一直都唔支持港獨，立場係唔會變嘅。佢又指美國制裁係美方國內事務，唔可以干涉。

既然人哋國家內政唔好干涉，但點解楊岳橋同該黨前議員郭榮鏗上年訪美，同美方官員代表討論《香港人權及民主法案》，並向美方提出要求盡快通過相關法案，唔知算唔算主動叫美國制裁香港官員呢？