中環出更：陸頌雄食住蛋糕 寸泛民攬炒變自炒
之前非建制派議員鄭松泰食藍店蛋糕慶生，被網民圍攻。不過有人彈亦有人鍾意，議員陸頌雄日前就買咗同款蛋糕當午餐食，話要挑戰吓成個食唔食得晒喎！佢一路食蛋糕一路寸泛民自動請辭投降，形容係攬炒派變自炒派。
指得番建制派 都有唔同意見
陸喺社交平台上載短片，話有同事推介呢款蛋糕，而佢當日咁啱冇時間食晏，要4點鐘先食到飯，所以就打算挑戰食晒成個蛋糕。佢唔單止邊食蛋糕邊寸泛民自炒，仲話議會得番建制派，有人會擔心得番一種聲音。但佢就話冇可能嘅，仲用個蛋糕做例子，話雖然係一間公司嘅出品，但入面有好多內涵同材料，就好似建制黨派都有唔同意見，但意見聚焦番喺經濟民生，唔再係意識形態上無謂嘅政治爭論喎。
食到最後四分之一個蛋糕，佢話本來打算用極速進食嘅方法，但驚自己會嘔，最後都係太飽，頂到上頸，惟有決定放棄個挑戰喇，剩低嘅當晚餐食。佢仲話食完個蛋糕有戰鬥後虛脫嘅感覺。不過，一個人食大半個蛋糕咁甜，為咗拍短片寸泛民，搞到有糖尿病，健康受損就唔好啦！
卓妮