中環出更：做義工化身明燈 陳玉桂：愈做愈覺有意義
義務工作有好多種，唔一定只限於賣旗嘅。香港菁英會執委陳玉桂就認為每個人嘅專長，有時都可以化為人哋嘅明燈同幫助，例如有朋友擅長玩音樂，於是就組成一個樂團，社會上受情緒困擾嘅人好多，聽吓音樂都有助佢哋紓緩情緒。
願景基金會日前舉行十面埋服社會創新服務大賽嘅頒獎禮，作為籌委會主席嘅陳玉桂話自己當年由外國讀完書返港，加入大學嘅海外同學組織，本身諗住識朋友，結果就由此投身義工嘅行例，歷年來嘅義務工作令佢愈做愈覺得有意義。
念慈功德會會董賴櫻華（Cherry）都做咗義工好多年，好享受幫助人嘅感覺。Cherry話做義工唔一定係幫手籌錢，有時團體要搞活動，就需要人手搜集枱櫈等各式各樣嘅物資，但往往缺乏方法處理物流嘅問題，呢個時候做義工比較有經驗嘅Cherry就可以幫佢哋張羅物資番嚟喇！
陳曉婷：幫嘅「小朋友」即將大專畢業
講起做義工嘅經歷，香港股評家及專業投資者協會創會會長黃竣渝同兩名現屆副會長謝承志及伍世棠都在場，黃竣渝話最鍾意參與幫助青年人同小朋友嘅義工活動，覺得同小朋友玩好開心。佢又留意到家長都比較願意陪同小朋友參與賣旗等義工服務，既可作為親子活動，仲可以教導小朋友關注有需要嘅人添！
今次活動嘅籌委會副主席陳曉婷就話做義工最深刻嘅感受就係見證小朋友嘅成長。佢話有啲小朋友出身基層，可能父母冇乜時間管教佢哋，以致價值觀同行為都有偏差，好在透過義工服務同佢哋有所接觸，睇住佢哋不斷改進。有啲小朋友由小學開始接觸，去到依家即將大專畢業投身社會，佢甚感安慰。
卓妮