政情：公民講場：海洋公園 恐製大白象工程

儘管早前獲政府注資救亡，不過海洋公園嘅前景仍未許樂觀。日前政府就提出「躍動港島南」計劃，期望將南區獨有嘅漁業及造船文化，串連以海洋公園為核心嘅旅遊路線，繼而塑造成適合工作同居住、充滿創意及消閒玩樂嘅地區。然而唔少人都擔心計劃會增加區內嘅交通壓力之餘，又憂慮經濟上嘅可行性，恐怕會製造出另一個「大白象工程」！商務及經濟發展局局長邱騰華不如直接啲，盡快制訂海洋公園嘅重生方案仲好啦。