政情：面對3案9罪許智峯：離開議會唔輕鬆
15位民主派立法會議員早前提出總辭，今個月中已向秘書處遞辭職信，其中最早辭職生效嘅民主黨（白鴿黨）成員許智峯（峯鴿），昨日就要交還位於大樓嘅辦公室。佢承認，自己並唔係抱住輕鬆嘅心情離開議會，因為至今有多案在身，不過就話對立會無歸屬感，完全冇唔捨得！
峯鴿話，自己喺早前短短3個月多次被捕，須面對3宗案件、合共9條控罪；又對喺佢議辦工作嘅同事感到愧疚，因為自己辭職而搞到人哋冇咗份工咁話喎。
指4年議會生涯如戰場
峯鴿仲話，有部分人可以返去黨部工作，但就礙於資源所限，所以唔能夠請番晒所有人，所以對部分同事因而面臨失業感到愧疚。至於會唔會幫佢哋手搵工？佢就形容呢件唔係容易嘅事，擔心自己幫手寫推介信，反而會變咗死亡之吻，會幫倒忙喎。
之不過，今日一別又有冇嘢唔捨得？峯鴿就話，自己對呢棟大樓無乜歸屬感，仲話一直覺得過去4年議會生涯好似喺戰場咁，所以冇乜嘢唔捨得；但就話議辦入面有好多市民送畀佢嘅紀念品、文宣、雜誌，形容呢啲係滋潤一生嘅記憶。佢又話，目前需要啲時間沉澱、梳理同思考過去嘅經歷，但就話唔會輕言放棄議會戰線，又唔排除未來有可能再參選添！