政情：新冠慘過沙士 何世柱：經濟復甦靠通關
香港疫情反覆、通關無望，各行業因為缺少人流而生意大減。勞工顧問委員會前資方代表何世柱話，新冠肺炎疫情嘅影響仲嚴重過2003年香港爆發沙士，希望港人做好防範措施、唔好鬆懈，又對海外市民要返港導致爆發疫情表示理解，但始終覺得中港兩地通關先可以解決經濟問題喇。
勸港人做好防範措施
曾擔任勞顧會委員逾30年嘅何世柱，憶起03年爆發沙士，雖然影響好大，但肆虐時間較短，後來內地鼓勵到港旅遊帶旺本港各行業，導致經濟好快復甦；反觀新冠肺炎疫情持續時間長，港人就辛苦好多。佢話早前本港疫情穩定嘅時候，內地都唔敢放旅客嚟香港消費，加上唔少海外港人需要回港，導致香港防疫工作出現漏洞。雖然何對漏洞感到理解，但都勸喻港人盡可能做好防範，減少去人多擠迫嘅地方。
至於政府早前宣布對本地確診者發放5,000元補貼，有人認為似「鼓勵染疫」。何就話事實並唔係咁，舉例話好多市民需要按日薪、時薪賺取工資，倘若拎唔到補助，頓失生計會好辛苦，甚至頂唔順呀。