中環出更：嫌太冗長鄭松泰陳沛然中途鬆人
過往發表施政報告民主派議員都會喺現場抗議，但尋日就一反常態，議會內唔單止冇示威，有部分民主派議員更選擇喺立法會外回應。至於剩番嘅兩名非建制派議員、熱血公民鄭松泰同埋醫學界陳沛然就中途離場。
民主派議員自從宣布總辭後，就冇再出席立法會嘅會議，即使尋日係發表施政報告都一樣。鄭松泰同埋陳沛然尋日雖有現身會議廳，不過佢哋都冇留足全程，坐咗約莫40幾分鐘就鬆人喇。
陳沛然隨後喺記者會上，就解釋話尋日聽咗大約半個鐘，就嫌講得冗長，所以決定返回辦公室處理文書工作，包括準備新聞稿同埋回應。佢仲話，自己鍾意做準備工作多啲，不過一路做一路都有聽施政報告。
泛民得葉建源用記者室
過往唔同黨派嘅議員，分別使用兩個記者室就施政報告向傳媒發表回應，不過今年非建制派就只有陳沛然同埋教育界葉建源兩人有用到記者室，其中葉建源仲係唯一一個民主派添。至於民主黨就有4位議員，以及公民黨議員譚文豪拉埋幾位黨友就到立法會外回應，其他民主派議員就影都冇喇。
卓妮