中環出更：施政報告催眠兩個幾鐘 議員遊魂陳肇始狂釣魚
延期超過一個月，新一份施政報告尋日終於喺立法會宣讀，仲講咗兩個幾鐘咁耐添，但唔少在座嘅議員都心不在焉，有個別議員仲閉目養神。
冇咗泛民主派議員，今次建制派議員全體出席會議，唔知係咪全程都咁和平，冇乜衝擊，所以佢哋可以放鬆戒備。期間唔少議員都有撳電話解悶，有啲議員更出現疲態，好似飲食界議員張宇人就似乎相當有倦意，更一度閉目養神；民建聯鄭泳舜喺會議開始冇耐，就似乎悶到發慌，不停撳電話、側坐、發呆，仲無聊到多次練習「轉筆」。
呢排疫情反彈，喺公眾席上旁聽嘅行政會議成員、副局長同政治助理都要分開隔位坐，期間見到行政會議成員史美倫一度閉目養神。實際上，喺施政報告宣讀咗大概1.5小時，食物及衞生局局長陳肇始就不停「釣魚」，昏昏欲睡。
開會訂大閘蟹 張華峰解畫
冇耐，又發現金融服務界議員張華峰（肥老闆）上網睇股市，當中包括滙豐控股同香港交易所，仲預訂大閘蟹，仲問幾時有得攞添！對方回應指即日可取，價值9,600蚊，肥老闆就回應話4時左右叫司機去攞嘞！
問番肥老闆，佢就笑言有關消息出咗街之後，好多人都問佢有冇大閘蟹。佢解釋話，本身晚上宴請友人食蟹，但無奈疫情嚴峻，為減少不必要社交接觸，就取消咗飯局。但蟹就已經訂咗，餐廳亦要求付款，又問佢幾時拎，所以只好喺會議期間急急回覆咁話。佢仲話希望疫情可以快啲好轉，到時大家再同朋友食大餐！
卓妮