中環出更：陳解頤細胞培植魚肉 免受污染推動可持續發展
食品行業一向係推動香港製造業增長嘅重要引擎，因應時代轉變，創新嘅食品科技當然不可或缺，而初創企業嘅作用亦不容置疑。陳解頤（Carrie）係一間生物科技公司嘅創辦人，佢同時係一位素食者，唔單止希望為環保出一分力，同時認為養殖動物嘅場所太密集，一旦動物染病就會迅速擴散，亦會使用激素等化學品，令佢擔心食物安全問題。
香港工業總會（工總）早前為加強初創企業同工商界嘅聯繫，設立平台畀企業介紹產品。Carrie嘅業務應用細胞培植技術培植魚肉，過程中唔涉及捕魚或養魚，所以魚肉內唔會含有重金屬、微塑膠等污染物，同時可以推動可持續發展，應付未來嘅糧食需求。Carrie坦言相關技術並唔係新鮮事，但喺香港應用就要「貼地」啲，例如顧及好多香港女性鍾意享用花膠，Carrie話浸發花膠過程繁複，依家利用細胞培植技術製造花膠，參考滴雞精嘅製作方法，令食用方法更加便利嘞！
另一間初創企業嘅客群係長者，研發食材軟化粉、食物塑形粉，令有吞嚥困難嘅人士都可以享用原汁原味嘅美食。點解會有咁嘅意念呢？原來企業其中一位創辦人鍾倩盈（Sandy）嘅公公經歷幾次中風之後，有吞嚥困難，眼見所居住嘅院舍只係每日提供一式一樣嘅糊餐，但事實上長者同樣可享受進食嘅樂趣，追求美食。Sandy亦認為好多院舍「濫於插喉」，只係畀長者食用流質食物，令口部肌肉進一步衰退，而研發軟餐，既可令長者有更多餐飲選擇，又可幫助佢哋安全進食，同樣令飲食營養更加均衡。
趙子翹冀工業翹楚伸出援手
工總轄下香港初創企業協會主席趙子翹（Jason）雖然唔認為工業界存有青黃不接嘅情況，但就同意業界需要因時制宜，進行升級轉型，正正需要有活力嘅初創企業團隊，為傳統工業界注入新意念以及新科技，應對行業痛點。Jason話好多初創企業嘅意念都值得欣賞，但無奈缺乏生產鏈畀佢哋實戰，故此希望多啲工業翹楚唔好吝嗇，多啲伸出援手啊。
卓妮