政情：議會新常態 工務小組一個鐘通過4項目
泛民主派議員總辭後，立法會工務小組委員會尋日召開會議，只係用咗一個鐘就極速通過4個工程項目撥款申請，合共涉款68.794億元，會議較仲比原定時間提前約一個鐘就完會，而呢啲項目會交畀財務委員會表決。
共撥款逾68億
議程首個項目係柴灣興建水務署總部暨香港及離島分署及懲教署總部大樓，仲有喺長沙灣污水泵房興建渠務署辦公大樓，分別涉款41.37億元同21.575億元，由於項目已喺早前嘅會議討論咗兩個鐘，尋日亦無議員發言，只係議員鄭松泰要求記名表決，最後獲得通過。而排喺最後嘅上黃宜坳食水供應系統提升工程同牛潭尾濾水廠擴展工程撥款申請，分別涉款1.365億元同1.366億元，同樣唔使討論就獲得通過。
會上亦通過涉款6,120萬元嘅匡智屯門晨崗學校擴建計劃，同埋涉款2.506億元嘅安達臣道石礦場用地發展及餘下行人連繫設施工程，兩個項目夾埋只係討論咗近一個鐘。